tujhya gala majhya gala lyrics / तुझ्या गळा, माझ्या गळा

तुझ्या गळा, माझ्या गळा

गुंफू मोत्यांच्या माळा 

ताई, आणखी कोणाला ?

चल रे दादा चहाटळा !

तुज कंठी, मज अंगठी !

आणखी गोफ कोणाला ?

वेड लागले दादाला !

मला कुणाचे ? ताईला !

तुज पगडी, मज चिरडी !

आणखी शेला कोणाला ?

दादा, सांगू बाबांला ?

सांग तिकडच्या स्वारीला !

खुसू खुसू, गालि हसू

वरवर अपुले रुसू रुसू 

चल निघ, येथे नको बसू

घर तर माझे तसू तसू.

कशी कशी, आज अशी

गंमत ताईची खाशी !

अता कट्टी फू दादाशी

तर मग गट्टी कोणाशी ?

-------भा. रा. तांबे